【本來話區域隔離兩三日，今日已經係第二十三日】
本報訊：佐敦區域隔離已達二十三天，多名立法會議員批評政府抗疫不力，施政混亂，徒然令居民飽受隔離之苦，對防範社區擴散作用不大。上週上任的防疫專員尤嘉莉醫生反駁，佐敦隔離區內出現病毒變種，全區隔離檢疫、隔離治療是必要措施，佐敦道官立小學改建的臨時醫院運作良好，市民毋須過慮。
無需過慮，蒸餾水就無須過濾。楊立鳴隨手將報紙掉喺牀頭櫈度，不知不覺已經係第七份蘋果日報，隔離狀態升級嘅第二個星期。
「上海街113到119號嘅居民，到你哋檢測，只要係陰性就可以走。」陰性就可以走？自從二月一號開始限制出入，楊立鳴每日就只可以根據防疫督察指示出入，來來去都只見到上海街113號嘅居民，成個區有幾多人都唔知，更加唔會知有幾多人因陰性檢測而成功逃出佐敦。
「走吧小紅，是時候了。」望住無化妝嘅小紅，楊立鳴無法想像當初點解會因為呢個女人而跌入隔離區域。兩個人着返衫，手挽手離開狹窄嘅劏房。
「殺死佢哋！殺死佢哋！」短短幾百米外就係水馬分隔線，喺樓上只能隱約聽到嘅呼喊聲，落到樓即刻異常清晰。
我哋只係病人，都係受害人，就算感染到都唔見得有幾大件事，至少仍然未獲得陰性證明嘅上海街113號眾居民，無一個係就死嘅樣。擔心被傳染嘅市民，居然咁神心特登嚟到隔離區外叫囂，實在相當空閒，楊立鳴心諗。
諗多無益，楊立鳴搖搖頭，拖住小紅行去油麻地小巴站，一直泊喺上海街街頭總站絕不抄牌嘅四部紅Van，如今成為咗物資站。楊立鳴愈嚟愈習慣檢測程序，哪怕係屈辱嘅程序。
「楊立鳴、姜小紅，夫婦，第二車。」全副防疫裝備嘅衛兵，用手上嘅Mp5步槍指指第二部紅van。
「你個女陽性，要去佐敦道官立小學接受治療。」一個防疫兵聲色俱厲咁樣講，隔住口罩都見到個口形。
「你俾我陪佢去啦，佢得四歲，唔識得照顧自己。」老母喺車上跌出嚟，唔理跌損嘅膝頭哥，向住車廂入面哀求。
應佢嘅只係紅van嘅引擎聲。雖然只係喺隔籬街，證實陽性嘅居民都會由紅van運去佐敦道官立小學。
「你無結果就翻去等消息，唔好喺度煽惑他人。」防疫兵對住老母講。
楊立鳴同姜小紅登上紅van。「楊立鳴、姜小紅，兩公婆呀嘛。都係未有檢測結果，一人一份生存包，一份夫妻生活包。翻去等聽日啦。」
（待續⋯⋯）
Search